काठमाडौं ११ असोज । एनभिए महिला तथा पुरुष क्लब भलिबल च्याम्पियनसिपको दोस्रो दिन पुरुषतर्फका ६ खेलहरू हुँदैछन् । सोमबार त्रिपुरेश्वरस्थित राष्ट्रिय खेलकुद परिषद् राखेपको कभर्डहलमा पुरुषतर्फका ६ खेल हुने भएका छन् । महिलातर्फको खेल भने भोलि मंगलबारबाट मात्रै सुरु हुनेछ ।
पहिलो खेलमा बिहान ८ बजेदेखि साविक लिग विजेता हेल्प नेपाल र बागमती प्रदेशबीच प्रतिस्पर्धा भइरहेको छ । दोस्रो खेलमा १० बजे गल्कोट स्पोर्ट्स क्लबले प्रदेश नम्बर २ को सामना गर्नेछ । तेस्रो खेलमा दावाली मिलन क्लबले १२ बजे गण्डकी प्रदेशसँग आमनेसामने हुनेछ ।
चौंथो खेलमा विभागीय नेपाल पुलिस क्लबले दिउसो २ बजे मणिमुकुन्द भलिबल क्लबको चुनौती सामना गर्नेछ । पाँचौं खेलमा नयाँ बजार सामाजिक युवा क्लबले ४ बजे कर्णाली प्रदेशको सामना गर्नेछ ।
आजको अन्तिम तथा छैटौं खेलमा बूढानीलकण्ठ भलिबल क्लबले साझ ६ बजे ढोरपाटन स्पोर्ट्स क्लबसँग पलिलो अंकको लागि खेल्नेछ । नेपाल भलिबल संघ एनभिएले आयोजना गरेको च्याम्पियनसिपमा पुरुषतर्फ १४ टोली र महिलातर्फ ६ टोली गरी २० क्लबको सहभागिता रहेको छ ।
च्याम्पियनसिपबाट पुरुषतर्फ ७ र महिलातर्फ ५ टोली चैतमा आयोजना हुने क्लब लिगमा स्थान बनाउने छन् । दुवै विजेताले ४ लाख प्राप्त गर्दा उपविजेताले २ लाख पाउने छन् । तेस्रो हुने टिमले १ लाख प्राप्त गर्नेछ । न्यूज कारखाना ।